បាត់ដំបង៖ រដ្ឋមន្រ្តីក្រសួងមហាផ្ទៃ សម្ដេចក្រឡាហោម ស ខេង បានអញ្ជើញទៅបោះឆ្នោតនៅមណ្ឌលអនុវិទ្យាល័យសោហឺ ខេត្តបាត់ដំបង ដោយក្នុងពេលនោះសម្ដេចបានលើកឡើងថា ចាប់តាំងពីមុននិងមកដល់ថ្ងៃបោះឆ្នោតក្រុមប្រឹក្សាឃុំសង្កាត់អាណត្តិទី៥នេះសម្តេចបានកត់សម្គាល់ឃើញថាគ្រប់គណ:បក្សនយោបាយទាំង១៧ បានអនុវត្តសកម្មភាពដូចប្រក្រតីដោយសេរីត្រឹមត្រូវស្របតាមច្បាប់។

សម្តេចក្រឡាហោមបានបន្តថា÷ «ការបោះឆ្នោតអាណត្តិទី៥ ២០២២នេះជាជោគជ័យមួយធំសម្រាប់ប្រទេសជាតិរបស់យើង ដែលវាជាកត្តាមួយរារាំងកុំឲ្យមានសង្គ្រាម កុំឲ្យមានការបែកបាក់ ផ្ទុយទៅវិញគឺវាសញ្ញាមួយយ៉ាងល្អសំដៅដល់ការរីកចម្រើនក្នុងមូលដ្ឋានថែមទៀត»។

យោងតាមរបាយការណ៍របស់គណ:កម្មការរៀបចំការបោះឆ្នោតខេត្តបាត់ដំបង ឲ្យដឹងថា គណ:នយោបាយដែលបានចុះឈ្មោះក្នុងបញ្ជី ខេត្តបាត់ដំបងមានគណ:នយោបាយសរុបចំនួន ១០គណ: និងប្រជាពលរដ្ឋដែលមានអាយុចាប់ពី ១៨ឆ្នាំឡើង និងមានឈ្មោះក្នុងបញ្ជីបោះឆ្នោតជាផ្លូវការមានជាង ៦៣ម៉ឺននាក់។

ការបោះឆ្នោតជ្រើសរើសសមាជិកក្រុមប្រឹក្សាឃុំ/សង្កាត់អាណត្តទី៥ បានធ្វើឡើងនៅថ្ងៃទី៥ ខែមិថុនានេះ ដោយមានគណបក្សនយោបាយចំនួន ១៧ចូលរួម ដែលនឹងដណ្តើមយកកៅអីក្នុងតំណែងជាសមាជិកក្រុមប្រឹក្សាឃុំ/សង្កាត់ នៅទូទាំងប្រទេសសរុបចំនួន ១១ ៦២២កៅអី ក្នុងចំណោមឃុំ/សង្កាត់ចំនួន ១ ៦៥២ ខណៈប្រជាពលរដ្ឋមានឈ្មោះក្នុងបញ្ជីបោះឆ្នោតប្រមាណជាង ៩លាន ២សែននាក់៕